Ksolok ba sira nebe reza ho neon ho laran

tamba Na’i Maromak sei rona sira!

Ami Aman,

no ema hotu-hotu Aman,

riku, kiak,

foin sa’e no katuas sira hotu,

iha Laleia, Manatuto no Portugal

tamba ami hotu hein hosi Ita ami nia Maksoy no Salvasaun

no Ita hanorin ami hadomi

hodi fo ksolok no haksolok

ema hotu nebe hadulas ami.

Ami Aman,

iha lalehan,

maibe Ita halo an kiikoan

hodi teen hosi foho leten

fatin nebe furak

Ita Boot haraik-An hodi tur hamutuk iha rai ho ema lubun boot

atu haklaken no fo sai: ksolok ba kiak sira, basá reino lalehan sira nian.

Nune’e sira hotu sente di’ak hamutuk ho Ita Boot,

sira hakarak kona Ita Boot,

hodi hako’ak Ita Boot,

hodi agradece ba lia foun nebe Ita lori mai

tamba sira la sente Ita hanesan malai ida seluk

maibe ema ruma nebe wainhira la hare ba rai

rahun hodi hanoin nonok iha Na’i Futar Lia,

hare hanoin maka’as tebes

ba ami ida-idak

hodi hare kona mai ami nia fuan.

Ami Aman,

tulun ami atu hahí Ita naran

no mos povo nebe Ita Boot hili ona.

Tulun nia atu buras iha Fé, Esperança no caridade

hatene moris hamutuk ho ema seluk

no kompreende katak la iha ema ida bele moris mesak

tamba Ita Boot la tun mesak hosi foho atu haklaken: ksolok ho sira nebe tanis, basa Maromak sei konsola sira

La iha moris ida nebe la iha terus

nune’e mak Povo Maubere hatene diak liu

tamba ne’e, oras ne’e nia terus hamutuk ho nia maun-alin sira seluk

hodi sente katak terus nebe akontece hanesan lolos ninian rasik

nia família,

tamba nia hatene Ita Boot mos tanis hamutuk ho sira nia moras aat no mos o nia belun sira mate, iha ema fuan fatuk tos sira nia oin, nebe dala barak Ita Boot hetan mos iha dalan laran.

Ami Aman,

iha rai, no mos lalehan,

atu hahí Ita Naran

la os ami nian.

Ami nudar Ita atan

Ita belun sira nebe buka Ita Boot nia domin

dala ruma hanesan bibi sira nebe la’o sala dalan

hodi hein atu Ita Boot nia bibi atan sira bele hetan hodi haklaken ba sira:

ksolok ba sira nebe laran maus basá sira sei ukun iha rai ne’e

ksolok ba sira nebe la rai hirus

liu liu ba sala maun alin sira nian

no mos lakohi lakon tempu

atu koalia aat ema seluk nia moris

maibe, uluk sira hahí no hawelok nafatin Ita Boot Naran

tamba ami simu buat hotu housi Ita Boot

hare, karau, no ami nia moris.

Nune’e deit, mak ami bele hatene fo

la loko-an

la hein atu ema selu

la hanoin atu ema hahí.

Nune deit, mak ami bele hetan dame,

dame nebe los liu

iha fuan

Ami Aman

ohin ne’e haraik aihan lor-loron nian,

fos nebe ami mos precisa.

Ita Boot hatene katak ami povo nebe serbisu na’in

nebe lori horas barak serbisu iha natar

povo nebe hakarak no luta ba liberdade

povo nebe Ita Boot dehan:

Imi haksolok bá, imi sira nebe oras ne’e, hamlaha, basá imi sei bosu

ho Ha’u nia Paun

Paun Moris nian

ho Ha’u nia Lia Fuan

nebe sei lori imi ba dalan lia los no justisa

nebe la iha ema ida atu hasai buat nebe la pertence ba nia

maibe liu liu sei fahe ba ema seluk uitoan nebe nia iha.

Ami Aman,

haraik perdua ba ami salan,

liu liu ba sala hirak nebe ami hanoin katak ami la halo

no hanoin ami nudar sarani nebe di’ak liu ema hotu

hodi haluha katak Ita Boot

han hamutuk ho ema maksalak sira

Ita husik ema feto pecadora ida mak fasse Ita Boot ain

no Ita hako’ak ema kiik sira

hodi haluha katak Ita Boot sai escândalo ba ema Judeus sira

no mos ba ema barak ita nia otas wainhira Ita dehan:

haksolok ba sira nebe laron mos, fuan mos no haraik-an, basá sei haré Maromak

basá sira sei hetan perdua ba sira salan sira

sei katak ema ruma hadomi sira

basá ba Maromak

lia los no sinceridade folin liu ahi oan lilin rihun ida

Maibé ba sira nebe, oras ne’e dadaun hamnasa

hodi tau laran deit ba justisa ema nian

ba sira nebe maski haraik bensaun ho ibun, sira haraik kastiga ho fuan

ba sira nebe haluha katak

Ita Boot hatene liu ema ida idak nia fuan

no mos Ita Boot hatene ko’alia Galole.

Ami Aman

nudar ami perdua ba ema nebe halo aat ami,

ba hirak ne’e ami husu Ita Boot haraik Kmanek hotu no Dame

Ami nia domin folin laek

ami terus ba injustisa, maibe ami perdua

tamba Ita Boot rasik hanorin:

ksolok ba sira nebe laran luak basá sira sei hetan laran luak

tamba ne’e maka ami iha ânsia

atu sente Ita Boot nia laran luak

nebe mos ami nudar Ita oan sira

ami sente hakotu lia hodi iha mundo sei iha Dame.

Hanorin ami hatene perdua

ba ema nebe halo aat mai ami, no la hatene ami.

Hanorin ami

atu ami hadomi lolos

hodi lalika barlake

atu ita nia foin sa’e bele kaben ho domin, laos tan karau sira, no osan mean

atu sira bele haksolok

no sente hamutuk buat nebe sira hakotu lia atu bele iha mundu foun!

Ami Aman

labele husik ami monu ba tentação

ida ne’e be ami hanoin katak ami nia moris folin liu

ema oan kiak

ema kiak no ema moras

tamba Ita Boot mak hakiak ita hotu

no Ita bolu no tau naran ba ami ida-idak

Isaías, Ana, Simão, Expedito no José

atu dehan: ksolok ba sira nebe simples basá sira sei haré naroman

mai ami ida idak Ita haraik dons

nebe ami hotu precisa.

Ami Aman

hasai ami hosi buat aat

hosi laran moras no ódio

hosi ibun aat no bosok

hosi tentação atu fa’an no sosa ita nia fiar

tamba domin labele sosa

no Ita Boot nia kruz todan

liu hotu-hotu

kruz ida seluk Ita lori nia mos ohin hodi dehan ba ita:

imi sei haksolok, wainhira, tamba ha’u, ema rai kuna ba imi, ema feto sira ko’alia aat imi, sei duni sai imi no hakarak oho imi, basa imi sei hetan prémio boot liu iha lalehan.

Ami Aman

Amen, Amen, Amen,

Ne’e mak ha’u dehan liu wainhira ha’u halo ha’u nia orasaun.

Amen ne’e katak hakotu lia

hakotu lia ho buat nebe nia foin reza

Dala hira ha’u sente coragem

iha servisu, iha escola,

iha natar, iha uma,

iha ha’u nia família

atu tau iha pratika

buat nebe ha’u reza ho ibun?

Medita nonók,

hodi la hasa’e ha’u nia lian,

atu rona Ita Boot nia lian

hau hatene katak

ksolok ba sira nebe reza ho fuan basa Na’i Maromak tilun sira

Ne’e duni, nune’e los, compromisso ne’e lia los

Amen iha sentidu liu

atu moris

iha momento ida-idak

iha ita nia moris.

Frei Hermano Filipe, Trad. Prof. Aurora

Cfr. Lc 6, 17-38; Mt 5 1-12

Laleia, 14.02.2004